GraduaTeD (^_^)

مرت الأيام.. و السنين .. و يا اليوم الي ودعنا في أجمل مرحله.. المرحله الجامعيه.. يا الله كيف انقضت الأيام بسرعه.. ما بقول ما حسينا فيها.. تخصصنا خلانا نحس و نص..


أذكر أول يوم ييت فيه الكليه.. اول سنه .. كاني اول مره اشوف الدنيا .. يالله كيف جذيه.. اشوف البنات و احس اني غير عن كل الموجودين .. الين ما إتأقلمت مع الجو و تعرفت على الى ربيعاتي و أطيبهم في الفاونديشن..


عاد الفاونديشن كان صدق غير.. كنا شله وحده.. و ما نخلي مناسبه ما نحتفل بها .. و لازم نطقم بين فتره وفتره.. يا كل الكلاس وردي.. يا كل الكلاس أحمر لوول على الفالنتين .. طبعا ها قبل 4 سنين احين عقلنا..


السنه الي عقبها تفرقنا و الي تخصصت IT والي تخصصت Business والي تخصصت تدريس.. في هالفتره تعرفت على عيون و طرفشانه و نونه و مسو .. ووايد طبعا بس ما عندهم نكات .. مواقف وااايد مرت علي ما اقدر انساها معاهم..


أحلى المواقف اذكرها مع مدرسنا الهندي.. هالمدرس الله لا يبلي احد به.. متعب نفسيا .. و مسمينه الجذاب العود.. هذا يشرح شي و في الكتاب شي ثاني.. و يسأل شي و ما يعرف شو يبي .. لوع بجبدنا لوعه .. تعبنا تعب .. سؤال جوابه في الكتاب 3 اسطر نكتب له معلّقه .. شعاره في الحياه .. اكتب اكثر..تاخذ درجات اكثر.. لوول


أما الاردني .. ما ابي اذكر له اي موقف.. مو لشي ما ابي يوم القيامه ياخذ شي من حسناتي لوول.. ابي انا الي آخذ منه على البلاوي الي سواها فينا .. الله يخس ابليسه و يهديه.. و المشكله مسوي روحه عندنا مطوع و داعيه .. ليته يدعي لنفسه..


الزبده.. ذكريات حلوه.. مرحله حلوه.. استمعت فيها .. تعلمت فيها الكثير.. و الياي أجمل و أشرق .. و راح أستفيد من كل الي تعلمته و ارد الدين لدولتي الحبيبه ...


في الختام: هذا مشروع تخرجي الي حاب يشوفه

Click Here